Exclusive Collections

希臘財長上個禮拜放風，提出三個可行解決希債危機的方法，其中一個較新穎是投降輸一半，即係借 100元只還 50元，假如我是債仔，我會無奈接受，起碼仲收得番一半。有睇過周星馳《賭俠》的朋友，會記得投降輸一半的劇情。 現實中，相信很多投資者今年手持股份已輸掉一半，他們心態是，「已經冇咗一半，現時扯白旗，豈非冇仇報！」問題係，輸咗五成，原來再跌六、七成甚至八成，機會大過一廂情願博反彈、返家鄉。 彭博資料顯示，市值 10億以上的股份，今年共有超過 200隻跌幅超過 50%，當中有 67隻瀉逾 60%，包括中海集運（ 2866）、熔盛（ 1101）及比亞迪（ 1211）等，跌幅超過 70%的亦有 20隻，包括霸王（ 1338）、思捷（ 330）、玖紙（ 2689）及蒙能（ 276）等。前周被洗倉的思捷，上周再跌 33%，今年跌足 77%。 適時止蝕　方為上策 按照現時劇情發展，希臘違約是肯定的，被踢出歐元區也是時間問題，重點是大賴或小賴。問題拖得越耐，對全球經濟帶來的禍害越大，找數金額亦會幾何級上升。 平心而言，歐債危機是 08年金融海嘯的延續劇，牛市早在 07年 10月結束，而 08年恒指由一萬點反彈至去年 10月 25000點，不是牛市重臨，只是熊市中較大的反彈浪。過去兩年根本沒有牛市，只有反彈。因此按此推算，今次熊市調整，有機會低過一萬點。 其實誠如歐洲股神安東尼波頓，在霸王出事後雖然死撐，到上月下旬亦要投降，減持逾 3000萬股，持股量減至 5%以下，即使賬面蝕超過五成，總好過到上周五埋單要輸夠六、七成。 無可否認，現時止蝕會好傷，但長期捱價，心理上更不好受，過程會非常痛苦。要記住，投降並不可恥，該投降不投才最愚蠢。 股榮

思捷（ 330）放榜後，股價兩日暴瀉三分一，揸住股票的朋友會問，究竟我做錯咗乜嘢？「我已經買藍籌唔買二三線股，點解會咁？」思捷噩夢帶出兩個訊息：（一）買藍籌原來都可以輸到阿媽都唔認得；（二）跌到海嘯價先撈底都要輸，原因係仲有沙士價。不耐煩再講多一次，輸一成唔止蝕，很大機會越輸越甘。 無論如何，思捷肯定會成為 MBA企業案例，但筆者最欣賞的，是前主席邢李㷧的沽貨哲學。邢李㷧是昔日當紅影星林青霞的夫婿，不知道的讀者請 Google一下。 邢氏 03年開始賣思捷，當時持股超過 40%。大股東沽貨，一般會被外界視為睇淡公司的訊號，但邢氏以行動及業績說服基金，思捷 03至 08年期間，盈利由 12億元翻四番至 64億元，收入則升兩倍，由 124億變成 372億元。 思捷 02年染藍後，不斷交出亮麗成績表，即使邢氏出貨價越賣越高，但思捷股價卻越戰越勇，由 03年初的 11元，累漲上升 10倍至 07年 10月的 121元歷史新高，名副其實的 10倍股。基金只要敢接貨，有贏冇輸。大戶嘗盡甜頭，讓每次邢氏出貨時，基金唔會 Say No，更爭相搶貨，算是異數。 邢氏累計套現逾 200億 邢氏 03年開始減持，至 06年間，大手減持約 6次，每次減持介乎 4%至 7%，規模雖大但由於仍身兼主席一職「睇實個檔」，基金仍然放心去馬接貨。邢氏 08年初辭去思捷所有職務後，股價隨金融海嘯一落千丈，去年 2月邢氏把握股價反彈高位時接近全部清貨，為基金界上了寶貴一課。 當時邢氏折讓 6%以 54.25元配售，反應理想要額外加碼，接貨者包括美資基金聯博（ AllianceBernstein，現時仍持有 6%為最大股東）。 人去股清，邢氏仍然可說服基金踴躍接貨，反映基金對邢氏有盲目信心，相信可以食過翻尋味，殊不如邢氏北風食尾糊，多個基金則臨尾香冇仇報。 紙上富貴變現實，邢李㷧演繹得完美無瑕，在思捷累計套現超過 200億元，還多於現有的 158億總市值。反觀股神畢菲特， 08年以 8元買入 2.25億股比亞迪（ 1211），股價 09年高見 88元時，賬面可勁賺 180億，同樣是 10倍股，但股神連減持部份、收回成本的意欲都欠奉，股價跌至 60、 40、 20元也沒有行動。 沒錯，股神現時賬面仍有 75%回報，但跌到如此，我相信他已經失去沽貨的勇氣，否則間接承認睇錯市。我不反對價值投資，但有糊唔食，今時...

今年港股無運行，連帶新股更加慘情， 46隻主板上市新股中，至今只有 7隻上升，超過八成仍然潛水。新股上市，如果冇人識，最好的宣傳工具自然係搵個夠份量的人「撐場」，亦即所謂的基礎或戰略投資者。 統計過去一年，共有 110隻新股上市，但到家依然有得升的，剩番 23隻，勝出率只有兩成。跟富豪或名人抽新股，結果通常都非常慘淡。除了一隻友邦保險（ 1299）全城叫好外，其餘的要返家鄉，路途仍遠。 富豪入飛抽新股，很多時都屬畀面派對，李嘉誠、鄭裕彤及李兆基，身家位位數以百億元計，拍拍膊頭，花數億入股，當識多個朋友，何樂而不為？反觀我們升斗小民，以為順風車咁好搭，天真地以為今次得米，結果新股夢碎，最終富豪輸粒糖，我哋輸間廠。即將來臨的新股潮，請大家不要再信名人效應了，拜託！ 金風科技最傷 累跌 75% 被譽為新股認購王的四叔，過去一年已沉寂下來，減少沾手認購，不過單買一隻麗悅酒店（ 2266）已經夠 PK，除上市日險守招股價，至今一直潛水，累跌 35%。麗悅主席邱達昌，亦是老牌地產佬，身兼遠東發展（ 035）主席，朋友叫到，除四叔入飛外，彤叔及華置大股東劉鑾雄，亦樂於參加派對，散戶以為星光熠熠無走雞，點知上市後越坐越傷心。 大孖沙中，以彤叔入飛最積極，與西京投資主席劉央，堪稱新股殺手王。兩人過去一年經典之作，是入股表現最差的新股——金風科技（ 2208），上市至今跌超過四分之三，至於同屬重量級新股的熔盛（ 1101），兩人亦同樣心有靈犀買中，股價累跌逾六成。 劉央被外界稱為女股神，買股眼光是否準確以後再講，但肯定的是劉氏相識滿天下。單是過去一年，其認購新股超過十隻以上，曾透露入股的融創（ 1918）、大唐新能源（ 1798）、華能新能源（ 958）等，全部潛水，最難得是劉氏並不介意，財富絕對同大孖沙有得揮。 至於大劉及超人，去年據報有入股的包括麗悅、宏橋（ 1378）及華能新能源，姿態低調，有關股份股價亦低迷。 事實上，富豪或機構投資者抽新股，大部份只設 6個月禁售期，期限一到，持股又少於 5%，一般會在場外散貨走人，故投資者勿自欺欺人，以為有富豪一齊陪同坐艇。 股榮

炒齡較短的朋友，上個禮拜可能經歷人生中最痛苦的一周。華爾街有句諺語： What goes up must come down，出得嚟行，預咗要還，在股市中無長勝將軍，今天你可以天下無敵，明日卻淪為地底泥。誠如 2008年金融海嘯威到盡的賺錢之神：保爾森（ John Paulson），今年睇錯市炒燶股，旗下王牌基金已經累跌三成。 誠蒙前輩指點，兩隻曾經風光一時的細股價，如今已富貴化為浮雲，仍持有奧瑪仕（ 959）或黃河實業（ 318）的朋友，百般滋味在心頭。 2004 年奧瑪仕購入希臘神話賭場權益，成功變身濠賭股，股價由 04月 10月 29日低位 0.45元起步，只花約一個半月時間，飆升 90倍，至 04年 12月 23日的 41元。升得勁，跌得仲急， 05年 3月，股價已跌返至 6元水平，較最高位跌 85%，現時股份已停牌，停牌前報 0.117元，較高位蒸發 99.71%! 奧瑪仕、黃河實業玩殘散戶 假設當年投資十萬，買入價 0.45元，個半月已逼近千萬富翁行列。如不懂收手， 3個月後已縮水至 123萬，到了今天仍死揸但放唔到，只餘下 2.6萬元，倒輸 74%。 另一隻玩殘散戶的，是黃河實業（前稱金龍船）。 05年初股份停牌，當時報 0.4元，及後宣佈折讓 98%，以每股 1仙發行 54億股新股，較停牌前只有 1億股股份，增發 53倍。 最出人意表的，是復牌後黃河股價竟不跌勁升，當時有好多散戶更以 2元樓上摸頂價買入。以 05月 3月 23日高見 2.225元計，當時市值超過 100億元，但 04年公司有資產淨值不夠 1億，業績仍然見紅。 黃河及後藉不同概念，股價竟能在 05至 07年期間，長期企於 1元樓上，以當時一間無實業股份，卻有逾 50億元市值，可謂嘖嘖稱奇。忠言永遠逆言，當時就連股壇長毛 David Webb亦警告，若配售成功，股價僅值 2仙，投資者將損失 99%。上周五股價報 3.3仙，較 05年停牌前還低 92%。不過，當年用 1仙筍價入股的大股東，其間不斷減磅，一早上岸賺大錢，成為唯一贏家。 不是阻止大家炒細價股，但入場前，記得唔好懶先計計數，切忌盲目跟風。 股榮

今周開始，除了為大家發掘股場新奇事物、揭示莊家蠱惑招數外，亦想借此分享投資心得及經驗，希望能與大家互相學習。 記得師傅教筆者炒股時，第一樣並非點去贏，而是去學輸。老人家點出輸錢的藝術，輸夠一成要認輸離場，保留實力等機會入場。普遍的投資者最大缺點是止賺不止蝕，回報有一成，立即割禾青，但同樣蝕足一成，卻不忍心割肉捨棄，一廂情願明天有希望。 要知道，一隻股份無論裂口或陰乾式下跌一成，其基本因素已經轉壞，遇上基金洗倉更加大獲，短時間內將繼續沉淪。不止蝕最經典例子，首選電訊盈科（ 008）。千禧年小小超鯨吞香港電訊，追溯至合股前股價，曾高見 90.9元，不幸摸頂高追卻不放手，現價跌到 3.46元，蝕足 96%！ 電盈例子並非冰山一角，由彭博資料顯示，過去十年竟超過 50隻股份，跌幅超過九成以上，最誇張的一隻智城控股（ 8130），累積跌幅 99.9994%，當年投資十萬蚊，現在剩下 6毫子。其他摸頂追入輸家身股份，包括「抽水大王」官永義孖寶：永義國際（ 1218）及永義實業（ 616），及近兩個月令散戶又愛卻更恨的威利國際（ 273）。 累跌超過九成股份都有同一個特點，且輸錢數目更數倍放大，留待下周解構。 股榮

上期講到員工身價，見有唔少讀者回應，不妨再講多啲。本港上市企業中，最多打工仔的上市公司，是中石油（ 857），總共有 55.3萬名，差不多是澳門總人口。其次是工商銀行（ 1398）的 39.7萬名及中石化（ 386）的 37.3萬名。滙控（ 005）則有 29.5萬名排第五，僅次建設銀行（ 939）之後。 上述公司皆為內地巨無霸或跨國企業，人多自然無可厚非。作為上市公司，僱員數目究竟可以少到邊個程度？答案係零。 企業員工少有兩種原因，一係長期停牌，復牌無望，自然炒晒不用傷神。另一類是物業、股票投資公司，講得好聽即係資產管理、價值投資，說穿了，其實是炒股炒樓不務正業。 以投資公司名義上市的港股，數埋有三、四十隻，但都有一個共通點，就是將多兵少。 金匡冇請人 員工成本 94萬 統計 8隻「投資」股，董事數目全部多過員工，當中最誇張要數金匡（ 286），最新年報披露，全間公司有五名董事（ 2名執董、 3名獨立非執董），無一位員工，但員工成本卻要 93.9萬元，金匡聲稱是附屬公司徵收的開支，但點解唔自己請人做呢? 金匡 07年曾經成為散戶熱捧愛股，當年員工有 7位，股價一度炒到 3蚊樓上， 08年減剩 1位，股價已變番毫子股， 09年炒埋最後一件，董事身兼多職，做決策、做秘書、會計、跑數、跑腿甚至清潔一腳踢。 One man band的公司則有兩間，分別為滬光國際（ 770）及大唐投資（ 1160），至於 09年曾獲陸東入股的華保亞洲（ 810），就有兩位員工。 究竟員工少，對公司賺錢能力以至股價有乜啟示，答案係無。去年股樓齊旺，但「投資股」半賺半蝕，與過大海賭大細無分別，且很大程度視乎董事而非員工投資眼光。股價今年則大上大落，滬光慷慨派特別息令股價抽升 86%，但如華保及嘉進（ 310）等，跌幅動輒 50%。 P.S.睇通告見到一單「無厘頭」公司回購行動，生命科技（ 8212）上周四以每股 2.7仙，合共回購 12股，使咗 3毫 3。要形容這單 deal，我會出張高登神獸卡「多卵魚」。 股榮

好多公司都會講，最重視員工價值，事關員工做生做死，無非為公司增值，創造財富。睇開波嘅朋友都知道，名牌大球會巴塞、曼聯等，位位球員身價過千萬元，但原來喺上市公司，員工平均身價（市值/員工人數）分分鐘幾千萬。最誇張嘅，身價甚至過億，拍得住美斯、 C朗。究竟邊間公司咁威，原來係股壇金手指謝清海揸旗的惠理集團（ 806）。 根據去年年報，惠理有 103位員工，以周二市值 108億元計，人均身價 1.05億元。舊年惠理賺 6.53億元，即係每位員工平均貢獻 634萬元，算係交到功課。作為資產管理公司，員工貴精不貴多，身價高自然無可厚非。不過令人嘖嘖稱奇的，居然有資源股員工身價逾千萬，但公司卻連年蝕錢，這間公司就是蒙古能源（ 276）。 位位身價 2556萬 年蝕 125萬 截至 3月底止，蒙能共有 248位員工，以公司周二市值 63.4億元計，人均身價 2556萬元。不過，集團去年繼續見紅，蝕超過 3億元，除開每名員工幫公司倒水 125萬元。其實，蒙能員工身價已經由高位大貶值， 08年 6月蒙能市值接近 1200億元，當時員工只有 159名，換言之，位位身價 7.5億元，可能是有史以來，企業員工身價最高紀錄。 煤礦股員工是否位位咁高，公平起見，搵來三間最大煤企比拼，神華（ 1088）有 6.5萬名職員、中煤（ 1898）及兗煤（ 1171）都有超過 5萬名員工，人均身價 300萬至 1100萬元不等，人均賺錢能力 16萬至 70萬元。 蒙能員工身價是否合理，大家慢慢判斷，但筆者最唔明的地方，是公司聲稱在蒙古六個地區擁有 33萬公頃煤，由 07年至今從事前期工作、勘探、繼而最近試產，居然只有 250位員工，難怪半年只是出產 5300噸原焦煤。 計計數，每日出產 29噸煤，計埋魯連城落埋場掘煤，每位員工每日都係出產 0.12噸。根據集團預期，今年產量 200萬噸，除非位位員工係戰狼 300「唔使停」，如果蒙能唔請人，以現時試產能力， 200萬噸要掘 68965日先掘到出嚟，即係 189年。

上周分享買股票首要學止蝕，今周再談不要戀上抽水股，否則會傾家蕩產。識財經的炒友，十個有十個都知道股神畢菲特的上市旗鑑巴郡，是全球最貴股票。以上周四收市價 11.41萬美元計，折合約 89萬港紙一股，最高峯則是 07年每股 15.2萬美元，即超過 118萬港元。 投資千萬 輸剩 1蚊都無 得高人指點，原來香港都有一隻天價股，上周五收市報 0.45元，但想像不到，追溯至 97年 8月 28日，該股竟然高見 1018萬元，真係前無古人，恐怕亦後無來者，如該股申請入「健力士世界紀錄」，應可順利當選。當年用 1000萬買入該股，現時 1蚊都無，當中奧妙是抽水無限次。天價股 92年以合盈名義上市，當時 IPO價 1蚊，發行股數 5000萬股。之後分別改名為東峻及大雄科技。 02年改名為漢基控股（ 412），沿用至今。 翻查公司資料，主要從事金融服務行業，涉及物業投資、證券投資及放債業務，即係無所事事。如果話官永義係抽水大王，漢基主席鄺啟成可稱得上吸水大笨象。由 2002年至去年， 9年間合共配股 22次，合共印發 128億股新股，抽水接近 14億元，即每年平均配股超過兩次。 大量配股自然令原來股權大幅攤薄，期內另發行 4批換股債，但更絕的，是大折讓供股玩殘股東。 02年 1供 10、 04年 2供 1、 07年 2供 1、今年 3月先 10合 1，然後 2供 1。 公司抽水司空見慣，最重要是否抽得其所，用得合時，遇到抽水股，領教一次算買個教訓，第二次要好心分手，第三次仍戀棧不走，則無藥可救，死咗罷就！ P.S.上周寫電盈 00年曾高見 90.9元，正確應為 142.5元，多謝讀者陳生指出。 股榮